ገድለ ቅድስት አርሴማ

ገድለ ቅድስት አርሴማ መጽሐፍ የቅድስት አርሴማን ገድል፣ ተኣምር እንዲሁም መልክእ አጠቃሎ የያዘ ሲሆን በግዕዝና በአማርኛ የተዘጋጀ መጽሐፍ ነው። የቅድስት አርሴማ ገድል አሥራ ስምንት ምዕራፎችን የያዘ ሲሆን ለሰባቱ ቀናት የተከፋፈለ ነው።

ከገድሏ በመቀጠል ሰማዕቷ ቅድስት አርሴማ ያደረገችው ተኣምር በመጽሐፉ የቀረበ ሲሆን ተኣምራቱ ገድለኛዋ እና ሰማዕቷ ቅድስት አርሴማ በተጋድሎዋ ወቅት እና በዚህ ዘመን ያደረገቻቸውን ተኣምራት ያካተተ ነው። ሐዋርያው ቅዱስ ዮሐንስ በወንጌሉ “ኢየሱስም ያደረገው ብዙ ሌላ ነገር ደግሞ አለ፤ ሁሉ በእያንዳንዱ ቢጻፍ ለተጻፉት መጻሕፍት ዓለም ራሱ ባልበቃቸውም ይመስለኛል” (ዮሐ ፳፩፥፳፭) እንዳለ ሰማዕቷ ቅድስት አርሴማ ያደረገቻቸው ብዙ ተኣምራት ቢኖሩም ሁሉንም በዚህ መጽሐፍ ማካታት እንደማይቻል ልንገነዘብ ይገባል። የሰማዕቷን ድንቅ ተኣምራት እንደ እግዚአብሔር ፈቃድ ወደፊት በህትመት፣ በድረ ገጽ እና በሌሎች መንገዶች ለምዕመናን እንዲደርስ የምናደርግ ይሆናል።

የቅድስት አርሴማ ገድል ሦስተኛው ክፍል መልክአ ቅድስት አርሴማን የያዘ ሲሆን ከአሁን በፊት በግዕዝ ታትሞ ምዕመናን ለጸሎት ሲጠቀሙበት የነበረውን በማረም እና ወደ አማርኛ በመመለስ የተዘጋጀ ነው።

ሰማዕቷ ቅድስት አርሴማ በጸሎቷ “መታሰቢያችንን የሚያደርገዉን፣ የተጋድሏችንንም መጽሐፍ የሚያጽፈዉን፤ በጸሎታችንም (በምልጃችንም) የታመነዉን፣ አንተ ይቅር በለው፤ በንጹሕ ፍቅርኽም ጤናን ስጠው። አቤቱ በእውነት የለመነኽን በኾነው ነገር ኹሉ ረዳትን ኹነው።” ብላ ልዑል እግዚአብሔርን በለመነችው ጊዜ “ምኞትሽ ኹሉ እንደ ቃልሽ ይደረግልሽ” (ገድለ ቅድስት አርሴማ ፲፰፥፶፰-፷) ብሎ የሰጣትን ቃል ኪዳን በማመን ምዕመናን ይኸነን ገድለ ቅድስት አርሴማ በሚገባ አክብረው በመጠቀም እና በጸሎቷ በመታመን ከሰማዕቷ ቅድስት አርሴማ በረከተ ሥጋ በረከተ ነፍስ እንዲያገኙ እንጋብዛለን።